هذه الشروط تنظّم استعمالك لتطبيق «مسافة» وموقع masafa.app. لما تسوّي حساب أو تستعمل التطبيق، يعني موافق عليها. هي قصيرة — اقراها مرة وحدة.
شنو هي مسافة
«مسافة» لوحة عراقية لخطوط التنقل اليومية المتكررة (المدرسة، الدوام، الجامعة). السائق ينشر خطّه اليومي: المناطق اللي يمرّ بيها وسعر كل منطقة، ولمن الخط (شباب، بنات، أو مختلط)، والدوام. والراكب يسجّل منين ولوين يريد. التواصل بينهم مباشر — «راسله» أو «اتصل» — والراكب يختار بمفتاحين إذا السواق يگدرون يتصلون بيه أو يراسلونه.
منو يگدر يستعمل مسافة
- اللي عمره ١٨ سنة أو أكثر. وإذا الراكب أصغر (مثل طالب بخط مدرسة)، يستعمله بموافقة وليّ أمره وتحت إشرافه — والأحسن وليّ الأمر يسجّل الطلب من حسابه ويختار «لبنتي» أو «لابني».
- حساب واحد لكل شخص، برقم هاتفه هو، والدخول برمز تحقق يوصل لرقمه.
التزاماتك
- معلومات صحيحة: اسمك وجنسك ومدينتك، ومناطق خطّك أو طلبك وأسعارها. فصل الخطوط (شباب/بنات) يعتمد عليها.
- حساب واحد: لا تسوّي حسابات ثانية، ولا تستعمل حساب غيرك. وحسابك مسؤوليتك: رمز الدخول يوصل لرقمك، فلا تعطيه لأحد.
- الاحترام: لا إزعاج ولا تحرّش ولا تهديد ولا كلام مسيء — بالمحادثات وبالاتصال.
- رقم غيرك مو إلك: أي رقم يوصلك عن طريق مسافة لا تنشره ولا تشاركه ويا أحد، ولا تستعمله لغير مشواركم.
- بلا وهم: لا خطوط أو طلبات وهمية، ولا إعلانات، ولا احتيال.
- إذا أحد ضايقك، اضغط «بلّغ عن هذا الشخص» برأس المحادثة، وفريقنا يتابع البلاغ وياك.
سلامتك
قبل أول مشوار، تعرّف على الطرف الثاني بالمحادثة، وتأكّد من السيارة ومكان الصعود، واتفقوا على كل شي بوضوح. وإذا الراكب طفل، وليّ أمره يتفق ويا السائق بنفسه. وإذا شفت شي ما يطمّن، لا تكمل، وبلّغنا.
شنو تگدر تسوّي مسافة
- توقف أي حساب يخالف هذي الشروط أو تحذفه، مؤقتاً أو نهائياً.
- تشيل أي خط أو طلب أو تعليق مخالف أو وهمي أو مو صحيح.
- تقرا المحادثة لما تتابع بلاغ أو سؤال دعم، مثل ما مكتوب بسياسة الخصوصية.
النشر مجاني
نشر الخط مجاني، والتسجيل والبحث والتواصل كلها بلا فلوس. الخط يبقى منشور ٧ أيام، وبعدها يتوقف بروحه لحد ما سائقه يمدّده بضغطة — مجاناً. ولما تسجّل خطّك أو طلبك، يظهر بالتطبيق وينزل بقناة مسافة بمدينتك، بلا رقم هاتفك.
«ادعم مسافة» اختياري: اللي يدعم يقدّم هدية، مو يشتري خدمة. الدعم ما يشتري أي ميزة، ولا يقدّم خطّك، ولا يغيّر شي بظهوره — غير شارة «داعم مسافة» بحسابك.
الخصوصية
شنو نجمع، ومنو يشوف رقمك ومتى — كله مكتوب بـسياسة الخصوصية. وتگدر تحذف حسابك بأي وقت من «حسابي» ← «حذف الحساب».
حدود مسؤوليتنا
نسوّي أحسن ما نگدر حتى يشتغل التطبيق ويوصّل الراكب بالسائق، بس ما نضمن إن الخط يتعبّى، ولا إن أحد يتواصل وياك، ولا إن المشوار يصير أو يمشي مثل ما اتفقتوا. مسافة مو مسؤولة عن تصرّف المستخدمين، ولا عن المشوار نفسه، ولا عن الدفع بينهم — بس نتابع كل بلاغ يوصلنا. والخدمة ممكن تتوقف فترة لصيانة أو لخلل.
تغيير الشروط
ممكن نعدّل هذي الشروط لما يتغيّر التطبيق. أي تغيير ننشره بهذي الصفحة ونحدّث التاريخ فوق، واستمرارك باستعمال مسافة بعده يعني موافق عليه.
التواصل
لأي سؤال عن هذي الشروط: محادثة الدعم داخل التطبيق، أو البريد support@masafa.app، أو صفحة الدعم.